conferenciasalnes@gmail.com

conferenciasalnes@gmail.com

XORNADA 12 MERCANTIL-MOURENTE

   Se as condicións climatolóxicas recomendan utilizar as pistas de tenis interiores do MERCANTIL será obrigatorio a utilización de zapatillas deportivas, pois estas pistas úsanse para xogar a tenis (evidente). Con esta norma trátase de evitar que a superficie quede marcada por solas de calzado non adecuado para a práctica deportiva. 


   Se finalmente xogamos baixo teito, estará ao alcance da Conferencia Rías Baixas superar unha marca histórica de maior número de varados, que tamén está en posesión desta Conferencia? A resposta é si, xa que nesta mesma superficie foi na que se estableceu a marca actual de 41 varados. 

    Naquel ano 2014 o número de participantes foi de 73. Esta variable xunto coa superficie dunha pista de tenis interior fixeron que se conseguiran 41 varados, cifra inalcanzable para as outras Conferencias. A ocasión parece propicia para superar este número e acercarse aos 50, tendo en conta que a participación normal deste ano é de 79 xogadores/as.  





   Curiosamente, a marca absoluta de número de varados foi conseguida por 20 palanadores/as, que non é a mellor marca en canto ao número de xogadores/as que fixeron varado nunha xornada, pois a Conferencia Norleste, aínda que ten a súa mellor marca por debaixo da Conferencia Rías Baixas con 38 varados conseguida esta temporada, si conseguíu que 28 xogadores/as conseguiran facer varado nunha xornada. Daquela, o reto é dobre para as nosas palanadoras e palanadores. Por unha beira, superar o número de varados nunha xornada, e por outra, que máis de 28 xogadoras/es fagan varado.

CATEGORÍA INFANTIL

   A clasificación mostra que Juanma Camiña, actual Campión Nacional da categoría, vai camiño do seu 3º Título de Conferencia consecutivo, ademais de ser un serio candidato a repetir Campionato Nacional. Adriana continúa sendo un referente feminino na LNB, pois ademais de ter moitas probabilidades de subirse ao podio na súa categoría, tamén está loitando coas palanadoras de categoría senior para entrar no podio adulto. Geno non acudiu a Barrantes e distanciase da segunda posición. Oscar é o palanador debutante de maiores prestacións, xa que empezou a xogar na 5ª xornada e xa está cerca do podio, exactamente a 32 puntos, quizáis demasiados para pensar que poida  alcanzar esta temporada as prazas de honor. Mais, dada a súa idade, 9 anos, é o futuro da categoría, xunto con Martiño, pois Geno pasa de categoría este ano e a Juanma e a Adriana quedaralles a seguinte temporada para cumprir idade. Entre estes nenos e nenas estará un ou unha futur@ Coroceir@ Nacional?



11ª xornada CATEGORÍA FEMININA




2ª-BEGO                1ª-TANIA        3ª-ELENA
   A triunfadora na Categoría Feminina foi Tania de Valpaços Terra Quente, que obtivo unha puntuación de 25 puntos. Unha marca excepcional! Con dicir que este número de puntos só foi superada, durante as 11 xornadas disputadas, por 8 palanadores e 1 palanadora, queda destacada a fazaña  conseguida pola xogadora de Vigo. Despois de sumar os puntos desta xornada a clasificación xeral segue encabezada por Bego e Lu é segunda, xa a moita distancia como para pensar que ten poucas probabilidades de alcanzar o título. Onde realmente vai haber emoción é para a última praza de podio, xa que Elena empata a puntos con Adriana (está diante dela por ter puntuación máis alta nunha xornada). Tania afianza a cuarta posición. E do quinto lugar para abaixo haberá loita por conseguir praza de PLAY OFF, pois entre Belmira que ocupa este quinto posto e Marisa, que é a primeira que se quedaría fóra, non hai máis ca 18 puntos. Entre elas están cinco palanadoras de Gharaboto, Casilda, Vanessa, Mónica, Inés e Marga, nesta orde. 
   Ademais, as que veñen por detrás aceleran a marcha. Así, Patri, no posto 17, está a 10 puntos dos 50, que marcan actualmente a fronteira entre participar no PLAY OFF e quedarse fóra. Daquela, as últimas 5 xornadas decidirán que mulleres visitaran a Comarca de Compostela o 28 de maio coa intención de mostrar que o Xogo da Billarda é e será sempre de xénero feminino.














11ª XOR BARRANTES

   A vitoria na categoría absoluta foi para Salgue, de Valpaços Terra Quente.  

3º-CHE            1º-SALGUE   2º-RICAR
  Despois de sumar os puntos desta xornada 11 e faltando 5 xornadas, os xogadores e xogadoras xa están facendo contas para ver se conseguen os seus obxectivos. Para unhas poucas persoas o obxectivo é o título de Conferencia, para outras moitas conseguir estar entre as prazas que dan dereito a participar no PLAY OFF NACIONAL LNB 2017. Entón, todo fai indicar que o Título de Conferencia irá para un destes catro palanadores: Xan, Ricar, Che ou Salva
   O último posto de clasificación para o PLOFF saberase definitivamente a finais de abril, despois de saber as porcentaxes de participación a esa data distribuiranse as prazas que corresponden a cada Conferencia. O procedemento é moi simple: en cada Conferencia contaranse o número de xogador@s que xogaron a mitade de xornadas, polo menos, despois sumaranse todos estes xogadores e xogadoras e saberemos cantas persoas participaron en cada conferencia ao longo das xornadas disputadas. Sobre o total calcúlase a porcentaxe de participantes que corresponde a cada Conferencia.    Daquela, a 12 de marzo 2017, á nosa conferencia correspóndenlle 24, pero este número pode variar a finais de abril. Entón, os que ocupan as prazas da 20 á 24 deberán esforzarse, xa que de momento están fóra destas prazas palanadoras e palanadores de moito nivel e prestixio.  
   








 

11ª xornada BARRANTES

PARTICIPACIÓN 
84

25 MULLERES
59 HOMES



O pavillón fixo que a clasificación de varados dera un chimpo. Ollo que está en perigo a clasificación do Campión Nacional da categoría. A "maldición 2017" está revoando a LNB. O Coroceiro Nacional en activo non se vai clasificar para defender a súa capa de palla, salvo que consega o triunfo no Aberto das Estrelas. E agora periga o Varadeiro Nacional. Que está pasando?


PODIOS

CATEGORIA ABSOLUTAdo EQUIPO
SALGUEVALPAÇOS TERRA QUENTEVIGO
RICARCORREDOIRASBUEU
CHERINOCERONTEPONTEVEDRA
CATEGORÍA FEMININAdo EQUIPO
TANIAVALPAÇOS TERRA QUENTEVIGO
BEGOCORREDOIRASBUEU
ELENAGHARABOTOMARÍN
CATEGORÍA INFANTILdo EQUIPO
JUANMALÚA DE FORZASANXENXO
OSCARARMADIÑAPOIO
ADRIANAVALPAÇOS TERRA QUENTEVIGO
CATEGORÍA EQUIPOSdo EQUIPO
CORREDOIRASBUEU
LÚA DE FORZASANXENXO
RINOCERONTEPONTEVEDRA




   
    Nesta xornada de Barrantes houbo dous equipos que conseguiron a súa marca máis elevada de puntos da temporada. Estes equipos foron Valpaços Terra Quente de Vigo e Armadiña de Poio. O equipo vigues empeza a demostrar que as fichaxes do seu director deportivo, Taxeiro, foron un acerto. Xa está pensando, o de Valpaços, en facer dous equipos para a temporada que vén. O equipo de Poio quere acabar a temporada consolidando a palanador@s que teñen moito futuro e algo de presente. Seica van preparar a conciencia a xornada 13 que se disputará en Poio. Co alento do seu público queren alcanzar o podio na categoría de equipos e feminina, que son as dúas categorías nas que aínda non conseguiron ocupar un posto. De todos os xeitos, o dominio absoluto de Corredoiras mantense e afirman que esta temporada van a polo título Nacional, despois de quedarse, o ano pasado, a un só punto dos Billardeiros Musicais de Ribadeo. 
   Na parte media da clasificación veremos se Laxe de Rons se manteñe firme ante o acoso de Valpaços Terra Quente. Nesta xornada o equipo vigués tivo 20 puntos máis que o equipo do Grove, que grazas a unha inesperada actuación de Martín non perdeu máis puntos. Casilledín, que xogou na casa, avanzou na clasificación para escapar definitivamente da praza de pechacancelas, ou iso é o que parece. Xa que, Andarela non acaba de reforzar o seu equipo e de novo só conseguiu presentar a 3 palanadores.
    A maior emoción está na zona que dá dereito a praza de PLAY OFF. Nesta xornada, tanto Lúa de Forza como Rinoceronte conseguiron reducir a vantaxe en relación ao equipo de Marín, Gharaboto. Deste xeito, o que parecía que ía ser unha loita pola terceira praza unicamente, entre o equipo de Sanxenxo e o de Pontevedra, igual se transforma nunha pugna de tres equipos por dúas prazas. Dos tres, un quedará sen disputar o Título Nacional. Estes tres equipos subiron ao podio Nacional nos últimos tres anos, Lúa de Forza conseguiu o título no 2014, Gharaboto conseguiu segundo lugar na 2015, e Rinoceronte ocupou o terceiro posto na 2016. Isto indica o potencial destes tres equipos. O espectáculo esta garantido ata o final. Un factor importante que resultará decisivo é o do número de xogadoras e xogadores de cada equipo. Así, pensamos que por lóxica numérica o equipo de Marín é o claro favorito dos tres para asegurarse unha praza. A outra praza, aínda non sabemos a que quilómetro da PO-308 terá que desprazarse. 




Salgue foi o protagonista principal da xornada. Ganou a xornada e ademais fixo 4 varados que o levan a entrar nas prazas para o PLAY OFF da categoría. Buscade a billarda, como fai Bego... está no teito do pavillón, mais acabou baixando.

   Ao volver ao pavillón o que sucedeu foi que as 7 prazas que dan dereito a disputar o Título Nacional de Varados foron asaltadas por palanadores que estaban fóra na xornada anterior. Deste xeito, púxose moi emocionante, tamén, esta clasificación. O nivel é moi alto nesta Conferencia, pois tres dos nosos palanadores xa foron Campións Nacionais nesta categoría e nos últimos dous anos houbo un Varadeiro Nacional das Rías Baixas, pero en Barrantes sucedeu o que parecía impensable, que o actual Campión da categoría, Che, e un dos mellores pegadores da LNB, quedou á beira do precipicio. A ameza é seria, sobre todo, porque os que veñen por detrás teñen brazo poderoso e non van ter piedade.


INFORMACIÓN ESTATÍSTICA

   A participación total corresponde ao número de xogadoras e xogadores que participaron polo menos nunha xornada de liga ao longo de toda a temporada. Ata a xornada 10 da temporada 2016-2017 teñen xogado 159 persoas. 
A participación media indica o número de participantes que xogan en cada xornada. Ou sexa, nesta temporada 2016-2017 cando se xoga unha xornada o normal é que se reunan a competir 78 persoas. 

   Podemos apreciar que o número de participantes por xornada está estabilizada por enriba de 70 nas últimas 4 temporadas, o que é algo fantástico, pois indica a consolidación dun colectivo que goza xogando á billarda e coa compañía de compañeiros e compañeiras das comarcas do Salnés, O Morrazo, Vigo e Pontevedra.

   En canto ao número de participantes totais, comprobamos que na temporada 2012-2013 houbo un cume de participación e que desde entón foi en descenso ata a temporada actual que volve a remontar. Estes números hai que interpretalos conxuntamente cos de participación en cada xornada, xa que estas cifras de participación total indican que todas estas persoas que participen na liga saberán que a billarda segue viva e practicándose, aínda que estes participantes sexan ocasionais e non compitan dun xeito regular. 

   En definitiva, hai que continuar no camiño de facer visible esta aventura chamada LNB para que cada vez aumente o número de persoas que se acerquen a xogar con nós. Tamén, debemos conseguir que cada vez haxa máis equipos estables que aseguren o espectáculo da billarda. Ver un grupo de cerca de 80 persoas de xeracións diferentes divertíndose e relacionándose dando golpes, non de estado, senón de país, é algo extraordinario.







CRÓNICA 2, 10ª XORNADA COTOBADE



Esta é a foto do podio en Cotobade que o equipo pontevedrés RINOCERONTE nos fixo chegar


   Está claro que este equipo antisistema quere sacudir toda a estrutura organizativa da LNB. Se non fora pouco o seu empeño en xogar as xornadas en campos selváticos, aínda que barruce, chova ou vente, agora busca desestabilizar o ánimo dos outros equipos co seu afán de aniquilar a identidade persoal de palanadores e palanadoras. Introduciron un virus no software de todolnb para alterar as fotos que consideren oportuno. Pedimos desculpas se algunha das súas manipulacións molesta a vosa sensibilidade.


Rinoceronte desafía á LNB poñendo cabeza abaixo o logo sagrado da tribo da billarda.
  




 Imos deixar, de momento, de lado as actuacións de Rinoceronte para centrarnos na xornada disputada en Cotobade. 


   Na categoría feminina, LU foi quen máis puntos conseguiu seguida de Bego e Adriana, que a acompañaron no podio. O terreo de xogo de herba non foi impedimento para que 5 palanadoras superaran os 10 puntos. A participación foi de 23 mulleres. 



   A clasificación xeral nesta categoría segue encabezada por BEGO. Nesta xornada, Lu obtivo 2 puntos máis que a súa compañeira de equipo e agora está a 22 puntos. Semella moita a distancia para que a de Beluso poida alcanzar á de Bueu, pero agora chegarán as choivas de primavera e todo é posible en pavillón. Na terceira praza do podio continúa Adriana. A xogadora de Valpaços Terra Quente alcanzou un punto máis ca Elena de Gharaboto, e agora son 2 puntos de vantaxe a favor da palanadora de Vigo. Entre elas dúas vai estar o último lugar do podio, xa que as demais están a cerca de 40 puntos de distancia. Ao mesmo tempo, ningunha delas pode alcanzar a segunda e primeira posición, pois están a 50 puntos de distancia. 

Despois de 10 xornadas e á falta de 6, así quedan os postos que dan dereito a participar no PLAY OFF 2017







   Na categoría absoluta, o triunfo foi para XAN de Lúa de Forza, seguido de Luís Camiña e Manolo Fariña, os dous de Gharaboto. Os xogadores que chegaron ou superaron os 20 puntos foron 7 e curiosamente 3 deles non están no TOP DEZ. Estes foron Manolo Fariña con 21 puntos, Carolo con 20 e Daniel con 20, tamén. Suliñar que Fari tivo que abandonar a xornada na segunda carreira por un asunto familiar grave. 


  O máis salientable dos resultados é que Ricar non conseguíu alcanzar o liderado que tiña a 2 puntos ao comezo da xornada. Unha semana máis continúa Xan na primeira posición. Así, Salva ao conseguir 24 puntos acércase a Ricar. Pola súa banda, Che continúa preto de Salva. Despois destas catro posicións hai unha distancia importante de cerca de 30 puntos coa quinta posición. O título que parecía cousa de dous pode que sexa de catro. Xa o di o refrán billardeiro:

"Se chove na primavera 
o pavillón espera, 
se a primavera é seca 
a palanar na herba."

   Será determinante a superficie na que se xogue? 

Verémolo!!




   Na categoría infantil a ausencia de Juanma foi aproveitada por Adriana que agora está a tan só 5 puntos do xogador de Lúa de Forza. O mesmo aproveitou Oscar de Armadiña para situarse na cuarta posición, por diante de Martiño, que tampouco xogou.


2º OSCAR (ARMADIÑA) 1º GENO (CORREDOIRAS) 3ª YAIZA (VALPAÇOS TERRA QUENTE)









Na categoría de varados a clasificación para o PLAY OFF 2017 está deste xeito
   



CRÓNICA 10 XORNADA COTOBADE

10ª XORNADA

COTOBADE

PARTICIPACIÓN
67

23 MULLERES
44 HOMES



RESULTADOS

CATEGORIA ABSOLUTA
do EQUIPO
XAN LÚA DE FORZA SANXENXO
LUÍS CAMIÑA GHARABOTO MARÍN
MANOLO FARIÑA GHARABOTO MARÍN




CATEGORÍA FEMININA
do EQUIPO
LU CORREDOIRAS BUEU
BEGO CORREDOIRAS BUEU
ADRIANA VALPAÇOS TERRA QUENTE VIGO




CATEGORÍA INFANTIL
do EQUIPO
GENO CORREDOIRAS BUEU
OSCAR ARMADIÑA POIO
YAIZA VALPAÇOS TERRA QUENTE VIGO





CATEGORÍA EQUIPOS do EQUIPO

CORREDOIRAS BUEU

RINOCERONTE PONTEVEDRA

GHARABOTO MARÍN




   Esta 10ª xornada xogouse nun terreo de herba especialmente preparado polo equipo local, RINOCERONTE. Sementaran un novo cespede no antigo campo de fútbol e actual campo da festa do lugar de Vilanova, na parroquia de Tenorio (Cotobade), en setembro do 2016 e durante estes 5 meses coidaron con cautela e dedicación unha superficie que saben que beneficia o xogo dos seus palanadores. Todo este traballo dou os seus froitos o sábado 25 de febreiro, xa que o equipo pontevedrés conseguiu unha puntuación que os acercou ao terceiro posto da clasificación xeral. Posto que dá dereito a participar no PLAY OFF 2017.
   
   De novo, CORREDOIRAS ganou a xornada con 80 puntos, despois quedaron os locais Rinoceronte con 74 e en terceira posición GHARABOTO con 69 puntos.






   Evidentemente, o título está decidido para o equipo de Bueu que avantaxa en 158 puntos ao equipo de Marín GHARABOTO. O segundo e terceiro posto do podio, que ademais son os que clasifican para optar ao Título LNB cos equipos representantes das outras conferencias, estarán disputados ata o final da temporada, xa que hai 3 equipos para dúas prazas. Hai uns meses parecía que o equipo pontevedrés de RINOCERONTE se quedaba moi lonxe desa loita, mais pasados os meses de inverno recuperouse e xa está a tan só 6 puntos da terceira praza. 
   Os equipos da zona media, LAXE DE RONS e VALPAÇOS TERRA QUENTE, manteñen as posicións quinta e sexta, respectivamente. Haberá que esperar a que as novas incorporacións do equipo de Vigo collan experiencia e despois veremos se lle van aportar os puntos necesarios para alcanzar ao equipo do Grove durante as xornadas da primavera. 
   Na parte baixa, as posicións tamén se manteñen. Así, ARMADIÑA resistiu na posición sete da táboa clasificatoria, aínda que por motivos de Entroido non puido presentar o seu cadro completo de xogadoras e xogadores. ANDARELA mantén a última posición e CASILLEDÍN non presentou competidor algún, pois os puntos que necesitan para evitar a última posición van obtelos na vindeira xornada que organizarán en Barrantes. Están preparando un campo de xogo que se adapta perfectamente ás súas condicións de xogo. 
   Nas últimas xornadas os equipos organizadores están acondicionando as superficies de xogo aos seus intereses, sempre dentro das superficies aceptadas pola LNB, terra, herba, area, cemento e asfalto. Así, ao xeito COPA DAVIS de Tenis, cada equipo local busca un terreo de xogo adecuado ás cualidades dos seus xogadores e xogadoras e que evite potenciar as virtudes dos equipos rivais. 







LUIS RINO, antes de empezar, facendo fochas na superficie de xogo para dificultar o salto das billardas.

Ademais das irregularidades do chan, o equipo RINOCERONTE preparou unha rede de cables por enriba. Así, varios xogadores e xogadoras viron como as súas billardas quedaron freadas por esta trampa de caza aérea.